ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་རྭ་རྒྱ་ཤེས་རིག་ནོར་བུའི་སློབ་གླིང་སྒོ་བརྒྱབ་པའི་རྒྱུ་རྐྱེན་དང་ཤུགས་རྐྱེན། ཨ་ཚོགས་བདེ་ཆེན་ཆོས་འཁོར་གླིང་བཤིགས་ཚར་བ། ༢༠༢༤ ལོའི་ཨོ་ལིམ་ཕིག་ལུས་རྩལ་འགྲན་ཚོགས་སོགས་ཡོད། ཆབ་སྲིད་བཙོན་པ་ངོ་སྤྲོད་ཀྱི་ལས་རིམ་ནང་༡༩༣༨ ལོར་སྙེ་མོ་རྫོང་དུ་སྐུ་འཁྲུངས་ཤིང་རྒྱ་ནག་གི་བཙན་དབང་ལ་ངོ་རྒོལ་འཐབ་འཛིང་གི་སྣེ་འཁྲིད་དེ་༡༩༦༩ ལོར་རྒྱ་ནག་གིས་འཛིན་བཟུང་དང་སྲོག་ཁྲིམས་བཅད་པའི་སྙེ་མོའི་ཨ་ནེ་འཕྲིན་ལས་ཆོས་སྒྲོན་ལགས་ངོ་སྤྲོད་ཞུས་ཡོད། ཀུན་གླེང་ལས་རིམ་དུ་ཨུ་རྒྱན་བསྟན་འཛིན་ལགས་ཀྱིས་བོད་དོན་ལས་འགུལ་བསྟི་གནས་ཁང་གི་འཕྲུལ་ལས་རིག་པའི་འགན་འཛིན་བློ་བཟང་རྒྱ་མཚོ་སྲི་ཐར་ལགས་ལ་ཉེ་ལམ་ཁོ་རང་ཨོ་སི་ཀྲོ་ལི་ཡའི་གྲོས་ཚོགས་འཐུས་མི་དང་ཕྱི་འབྲེལ་ལས་ཁུངས་ཀྱི་འབྲེལ་ཡོད་མི་སྣར་ཐུག་ནས་བོད་དོན་ཞུ་གཏུག་གནང་བའི་སྐོར་བགྲོ་གླེང་ཞུས་པ་ཡིན།